Published On:Saturday, April 18, 2015

Posted by my storry

नेपाल अडिटर्स एशोसिएशन (अडान) का बरिष्ठ केन्द्रीय उपाध्यक्ष सूर्यप्रसाद अधिकारीले नेपालका रजिष्टर्ड अडिटर (आरए) हरुलाई चार्टर्ड एकाउण्टेण्टहरु सरह अधिकारसम्पन्न बनाउन आफुहरु क्रियाशिल रहने बताउनुभएको छ ।

चित्तवनमा नेपाल चार्टर्ड एकाउण्टेण्ट्स संस्था (आइक्यान) को तीन दिने अनवरत पेशागत शिक्षा तालीम उदघाटन गर्दै उक्त कुरा बताउनुभएको हो ।

आइक्यानको सातौं काउन्सिलका उम्मेदवारसमेत रहेका अधिकारीले नेपालको कानून र आइक्यानको संरचना नै विभेदकारी भएको कारण लेखापरीक्षकहरुलाई मर्का परेको बताउदै त्यसलाई हल गर्नका लागि आफुहरु संस्थागत रुपमा नै निर्वाचनमा होमिनुपरेको बताउनुभयो ।

आफुलगायत यादव न्यौपाने, ध्रुव पौडेल र गणेश राईलाई विजयी बनाएर लेखापरीक्षकहरुको अधिकार, कर्तव्य र क्षमतावृद्धिका लागि सहयोग गर्न अधिकारीले आग्रह गर्नुभयो ।

कार्यक्रममा बोल्दै अडानका प्रथम उपाध्यक्ष तथा आइक्यानका पार्षद मोहन सुवेदीले आइक्यानलाई आरएमैत्री बनाउन आफुहरुले हरसम्भव प्रयास गरेको बताउदै आगामी काउन्सिलले त्यसलाई पूर्णता दिने बताउनुभयो ।

अडानका केन्द्रीय उपाध्यक्ष तथा आइक्यान पांचौ काउन्सिल सदस्य कृष्ण पौडेलले मुलुकभरका सबै लेखापरीक्षकहरुले अडानका चारै उम्मेदवारलाई अत्यधिक मतले विजयी बनाएर पेशागत एकता र सामथ्र्यता देखाउनुपर्ने बताउनुभयो ।

कार्यक्रममा अडान पूर्व केन्द्रीय उपाध्यक्ष माधव पराजुली, केन्द्रीय सदस्य रामजी अधिकारी, मध्यमाञ्चल क्षेत्रीय अध्यक्ष केशव पौडेल, पूर्व केन्द्रीय सदस्य शरद बर्तौलालगायतले बोल्नु भएको थियो ।

कार्यक्रमको अध्यक्षता चित्तवन जिल्ला अध्यक्ष देवी डल्लाकोटी र सहजीकरण उपाध्यक्ष ढाकानाथ पौडेलले गर्नुभएको थियो । तालीममा चित्तवन, नवलपरासी, गोरखा, लमजुङलगायत जिल्लाहरुबाट एक सय लेखापरीक्षकहरुको सहभागिता रहेको छ । तालीमको आयोजना प्रोफेसनल सोलुसन र व्यवस्थापन अडान चित्तवनले गरिरहेको छ ।