काठमाण्डौ चैत्र  ११,
संविधान सभाका अध्यक्ष सुवासचन्द्र नेम्वाङले यही १५ गते पाँच बजे सम्ममा सहमति गर्न दलहरुलाई समयसिमा दिनुभएको छ ।
प्रमुख दलका प्रमुख सचेतकलाई आज आफ्नो कार्यकक्षमा बोलाएर उहाँले १५ गतेभित्र सहमति गर्न निर्देशन दिनुभएको हो ।
अध्यक्ष नेम्वाङले सहमतिका नाममा लामो समयसम्म संविधानसभा स्थगित गर्न नमिल्ने भन्दै १५ गते साँझ पाँच बजेसम्म सहमति गर्ने समयसिमा दिनुभएको एकिकृत नेकपा माओवादीका प्रमुख सचेतक गिरिराजमणि पोखरेलले जानकारी दिनुभयो ।
उहाँले १५ गतेसम्म पनि दलहरुबिच संविधानका विवादित विषयमा सहमति नभए त्यसपछि संविधान सभाको बैठक बोलाउने बताउनु भयो ।
सभाध्यक्ष नेम्वाङले नेपाली कांग्रेस, नेकपा एमाले, एकीकृत नेकपा माओवादी, मधेश केन्द्रीत सहित आठ राजनीतिक दलका प्रमुख सचेतकसँग छलफल गर्नुभएको हो ।
उहाँले एक हप्ता अघि संविधानका अन्तरवस्तुमा सहमति वा प्रक्रियामा जाने विषयमा टुंगो लगाउन आजसम्मको समयसिमा दिनुभएको थियो ।
यो बिचमा दलहरुले संविधानका विवादित विषय संघीयता, सासकीय स्वरुप, निर्वाचन र न्याय प्रणालीका विषयमा कुनै औपचारिक वार्ता नगरेपछि सभाध्यक्षले फेरी १५ गतेसम्मको समय दिनुभएको हो ।