नगद पुरस्कार पाइने नेपाली सामाजिक संजाल सार्वजनिक

१३ फागुन काठमाडौं,   – नेपालीले विकास गरेको प्रयोगकर्तालाई खाता खोल्दा, साथी बनाउदा रिवार्ड (नगद पुरस्कार) दिने विशेषतासहितको सगुन डटकम बुधबार विश्वब्यापी रुपमा सार्बजनिक भएको छ । वेवसाइटमै सोसल स्मार्ट कार्ड र व्यक्तिगत तथा व्यवसायिक पेज भएको साइट अमेरिकामा रहेका नेपालीहरुले स्थापना गरेको सगुन इंकले सार्वजानिक गरेको हो ।

कुनै समय पेन्टागनमा सिस्टम इन्जिनियरको रुपमा काम गरेका गोविन्द गिरीले स्थापना गरेको कम्पनी सगुन इंकले यस्तो एप्लिकेशन निर्माण गरेको हो । पेन्टागनमा रहँदा गिरीले सगुनलाई गुगलजस्तै सर्च इन्जिन बनाउने प्रयास गरेका थिए ।

सूचना प्रविधि क्षेत्रमा केही फरक काम गर्ने इच्छा बोकेका गिरीले त्यही सगुनलाई सामाजिक सञ्जाल जस्तै ‘सगुन’ एप्लिकेशनको विकास गरेर सार्बजनिक गरेका छन् । यसमा फेसबुक, ट्वीटर, ह्वाट्स एप, स्न्याप च्याट, इन्स्टाग्रामसहितका मेसेजिङ साइटको विशेषता छ नै । त्यस अतिरिक्त यसमा खाता खोल्दा, साथी बनाउँदा, सेक्रेट म्यासेज पठाउदालगायतका साइटमा इन्गेज भएर विभिन्न गतिविधि गर्दा प्रयोगकर्तालाई रिवार्ड प्राप्त हुन्छ । यसलाई सगुन सोसल स्मार्ट कार्डका रुपमा प्रयोग गर्न सकिन्छ । विशेष प्रकारले डिजाइन गरिएको यो कार्डले ग्राहकलाई अनलाईन सपिङ गर्न र अनलाइनमार्फत उपहार प्रदान गर्न सहज बनाउछ । प्रयोगकर्ताले खाता खोल्नासाथ आफ्नो पिग्गी बैंकमा ५ डलर प्राप्त गर्छ ।

त्यसै गरी अन्य गतिविधिबाट जम्मा भएको रकम निश्चित समयपछि सगुन इंकले आधिकारिकता प्रदान गरेका खुद्रा विक्रेतासँग आफ्नो स्मार्ट कार्ड प्रयोग गरेर सपिङ गर्न सकिन्छ । कार्ड प्रयोगकर्ताको प्रोफाइल सगुन एप्समा समावेश गरिएको हुन्छ । यो डिजिटल उपहार प्रदान गर्न चाहनेका लागि ‘वन स्टप शप’ हुनेछ । सुचिकृत विक्रेताहरुकोमा गएर सबैभन्दा पहिला यो स्मार्ट कार्डको प्रयोग गर्नेले ५ अमेरिकी डलर बराबरको पुरस्कार प्राप्त गर्नेछन् ।

यससँगै रहेको मी पेजले प्रयोगकर्ताको व्यवसायिक उपलब्धि हासिल गर्न र समाजिक जीवनको प्रभाव बढाउने मद्दत गर्नेछ । यसअघि सगुनले ‘सिक्रेट’ र ‘ओकेजन’ एप्लिकेशन लञ्च गरिसकेको छ । जसमा प्रयोगकर्ताले तस्वीरमार्फत उनीहरुको व्यक्तिगत क्षण एक अर्कामा साटासाट गर्न सक्छन् । कुनै विज्ञापन बिना अहिलेसम्म सगुनमा १ लाख १६ हजार रजिष्टर्ड प्रयोगकर्ता छन् ।