५ जेठ, काठमाण्डौ । सोमबार दिउँसो टुँडिखेल पुग्दा ५ दिनकी सुत्केरी सुजाता बस्नेत कतिबेला खाना खान पाइएला भनेर कुरिरहेकी थिइन् । बिहानदेखि बिस्कुट र चाउचाउको भरमा रहेकी उनी २ बजेतिर कुनै संस्थाले दिने भात कुरिरहेकी थिइन् ।  कान्तिपुर दैनिकमा समाचार छ ।

 

उनले पर्याप्त खाना खान नपाएर बच्चालाई पुग्ने गरी दुध आइरहेको छैन । दोलखा चरिकोटकी उनी  १२ गतेको भुइचालोपछि पालमा बसिरहेकै बेला उनलाई सुत्केरी बेथा लागेको थियो रे । बच्चा जन्माउनका लागि गत मंगलबार बिहान थापाथलीस्थित प्रसुती गृहमा भर्ना भएकी उनलाई भुइचालोपछि अस्पतालले फर्काइदिएको थियो । 'भुइचालोको धक्काको त्रासमा दुई दिन बेथाले छटपटाउँदै पालमै बसें,' उनले भनिन्, 'बिहिबार मात्र अस्पताल पुगेपछि बच्चा जन्मियो ।'

 

'दुख कष्ट सहेर बच्चा त जन्मियो अहिले न त कपडा छ न खाना नै,' उनले भनिन्, 'एउटा संस्थाले एक सरो कपडा र दिनको एक पटक खाना दिनुभाछ । अरु कसैले केही दिएको छैन ।'