५ चैत, काठमाडौ । नेपाली कामदार लिन इजरायल तयार भए पनि दुई देशबीच मोडालिटीमा सहमति हुन नसक्दा कामदार जानबाट बञ्चित भएका छन् ।

कामदार लिने र पठाउने विषयमा ६ महिनाअघि नै सहमति भए पनि कसरी पठाउँने भनेर मोडालिटीमा अहिलेसम्म सहमतिमा पुग्न नसक्दा जाने प्रतिक्षामा रहेकाहरु निराश हुन थालेको अन्नपूर्ण पोष्टमा खबर छ ।

इजरायलले सुरुमा पाइलट प्रोजेक्टअन्तर्गत तीन सयजना नेपाली कामदार लिन लागेको हो । यसका लागि उसले विभिन्न सर्त अघि सारेको छ ।

कामदार आदानप्रदान प्रक्रिया र मोडालिटीका सम्बन्धमा सहमति कायम गर्न दुई देशबीच चारपटकसम्म मस्यौदामा छलफल र परिमार्जन समेत भइसकेको छ । दुई देशले इमेल तथा चिठीमार्फत सुरुमा बनाएको मस्यौदामा संशोधन गरिसकेका छन् । तर, अहिलेसम्म निचोडमा भने पुग्न नसकिको सम्बद्ध अधिकारीले जनाएका छन् ।

श्रम तथा रोजगार मन्त्रालयका प्रवक्ता बुद्धिबहादुर खड्काले कामदा पठाउने मोडालिटीको मस्यौदामा धेरैपटक छलफल पत्र आदानप्रदान भए पनि सहमति हुन बाँकी रहेको बताए ।