२८ मंसिर, रामेछाप । रामेछापको दोरम्बामा करेन्ट लागेर तीन जनाको मृत्यु भएको छ । 

घरमा विद्युतीय उपकरणमा आगो लाग्न थालेपछि घरको मेन स्वीच अफ गर्ने क्रममा तीन जनाको मृत्यु भएको प्रहरीले जनाएको छ ।

मृत्यु हुनेहरुमा दोरम्बा ५ का २५ वर्षकी चन्डिका तामाङ, ६५ वर्षका इन्द्रबहादुर थापा मगर र दोरम्बा ७ का ६० वर्षका अम्बरबहादुर थापा मगर रहेका छन् ।

करेन्ट लागेका एक जनाको घटनास्थलमै र दुई जनाको उपचारका लागि स्वास्थ्य संस्थामा लैजाँदै गर्दा बाटैमा मृत्यु भएको हो ।

रामेछापमा वितरण गरिएको ११ हजार भोल्टेज विद्युतीय तार आइतबार बिहान ४ बजे दोरम्बाको मानेमा चुँडिएर गाउँमा वितरण गरेको लाइनमा छोएको छ । 

गाउँमा वितरण गरिएको लाइनमा ११ हजार भोल्टेट प्रवाह हुन थालेपछि घरघरमा रहेको विद्युतीय उपकरण जल्न थालेका थिए ।