२१ माघ, मोरङ । पहँुचको अभावमा मोरङमा रहेका सात हजार अपाङ्गता भएका व्यक्ति अपाङ्गता परिचयपत्रबाट वञ्चित छन् । 

मोरङमा रहेका १७ हजार अपाङ्गता भएका सर्वसाधारणमध्ये १० हजारले परिचयपत्र लिएको र बाँकी सात हजारले पहँुचको अभाव र स्वास्थ्य प्रतिकूलताको कारणले परिचयपत्रबाट वञ्चित भएको राष्ट्रिय अपाङ्ग महासङ्घ पूर्वाञ्चल क्षेत्रीय कार्यालय विराटनगरका  प्रमुख उत्तम शिवाकोटीले जानकारी दिए ।

मोरङको पूर्वी पहाडी जिल्ला वारङ्गी, रमिते खोला, जाँते, लेटाङबाट आएका मानसिक अपाङ्गता भएका सर्वसाधारण परिचयपत्र पाउनबाट वञ्चित भएको बेलबारी अपाङ्गता सङ्घकी अध्यक्ष सीता बराइलीले बताए ।

मानसिक अपाङ्गता भएकाले चिकित्सकलाई भेट्न नसक्ने र सम्भव नहुने भएपछि परिचयपत्र लिनबाट वञ्चित हुनुपरेको उनको भनाई छ ।