२१ जेठ, काठमाडौँ । विश्व फुटबल महासङ्घ (फिफा) को बरियतामा नेपाल दुई स्थान तल झरेको छ ।

फिफाले आज सार्वजनिक गरेको नयाँ बरियताअनुसार १८१ स्थानमा रहेको नेपाल १८३औँ स्थानमा पुगेको हो ।

छिमेकी मुलुक भारत छ स्थान फड्को मार्दै १४१आँै स्थानमा पुगेको छ । योसँगै भारत दक्षिण एसियामा शीर्षस्थानमा पुग्न सफल भएको छ ।

अघिल्लो महिना शीर्षस्थानमा रहेको अफगानिस्तान भने १६ स्थान तल झर्दै १५१औँ स्थानमा पुगेको छ । त्यस्तै, भुटान चार स्थान माथि उक्लँदै १५९ मा, बङ्गलादेश तीन स्थान चढ्दै १६६ मा छ भने त्यत्तिनै स्थान माथि चढेको पाकिस्तान १७० स्थानमा पुगेको छ ।

माल्दिभ्स भने ३८औँ स्थान तल झरेर १७७ औँ स्थानमा चित्त बुझाउन बाध्य हुँदा श्रीलङ्का दुई स्थान बढुवा हुनाका बाबजुद १८६औँ स्थानमा रहँदै दक्षिण एसियाको बरियताको पुछारमा रहेको छ ।

बरियताको शीर्षस्थानमा विश्व विजेता जर्मनी कायम रहँदा बेल्जियम दोस्रो स्थानमा उक्लेको छ । विश्वकपको उपविजेता अर्जेन्टिना एक स्थान तल झर्दै तेस्रो स्थानमा पुगेको छ भने कोलम्बिया र ब्राजिल आफ्नो पुरानै स्थानमा क्रमशः चौथो र पाँचांैँमा छन् ।

त्यसैगरी, नेदरल्यान्ड्स, पोर्चुगल, उरुग्वे, फ्रान्स र स्पेन क्रमशः छैटौँ, सातौँ, आठौँ, नवौँ र दशौँ स्थानमा छन् । रासस

२१ जेठ, सुरुङ्गा (झापा), । पूर्व–पश्चिम राजमार्गअन्तर्गत झापाको बिर्तामोड नगरपालिका–६ मा ट्रकको ठक्करबाट एक व्यक्तिको आज बिहान मृत्यु भएको छ ।

पश्चिमबाट पूर्वतर्फ जाँदै गरेको नम्बर नखुलेको ट्रकको ठक्करबाट बिर्तामोड नगरपालिका– ५ निवासी ४५ वर्षीय रुद्र परियारको मृत्यु भएको जिल्ला ट्राफिक प्रहरी कार्यालय झापाले जनाएको छ । उनलाई गएराति राजमार्गमा पैदल हिँडिरहेका बेला ट्रकले ठक्कर दिएको प्रहरीले बताएको छ ।

ट्रकको ठक्करबाट गम्भीर घाइते भएका परियारको उपचारका क्रममा धरानस्थित बिपी कोइराला स्वास्थ्य विज्ञान प्रतिष्ठानमा आज बिहान मृत्यु भएको जिल्ला ट्राफिक प्रहरी कार्यालयका प्रहरी हवल्दार याम खड्काले जानकारी दिनुभयो ।

परियारलाई ठक्कर दिने ट्रक र चालक फरार रहेकाले खोजीकार्य भइरहेको बताइएको छ ।

छोरालाई स्कुल पुर्याउँदा आमाको मृत्यु

यसैबीच, छोरालाई स्कुल पु¥याउन हिँडेकी बिर्तामोड नगरपालिका–१ निवासी २६ वर्षीया होमा धितालको स्कुल बसको ठक्करबाट मृत्यु भएको छ ।

छ वर्षीय छोरा इसानलाई स्थानीय हिमरेश बोर्डिङ स्कुल पु¥याउन साइकलमा पछाडि राखेर हिँडेकी उनलाई एमिटी एजुकेसन फाउन्डेसन बिर्तामोडको मे १ ख २२८ नम्बरको बसले अतिथि सदन सडकखण्डमा ठक्कर दिएको थियो । बसको ठक्करबाट उनको घटनास्थलमा नै मृत्यु भएको छ भने इसान गम्भीर घाइते भएको जिल्ला ट्राफिक प्रहरी कार्यालय झापाले जनाएको छ ।

धिताललाई ठक्कर दिने बस र चालकलाई प्रहरीले नियन्त्रणमा लिएको बताइएको छ । रासस

२१ जेठ, भक्तपुर  । जिल्ला कृषि विकास कार्यालय भक्तपुरले भूकम्पले पूर्णरुपमा घर भत्किएर बीउ झिक्न नसकेका पीडित कृषकलाई निःशुल्क धानको बीउ वितरण गरेको छ ।
जिल्लामा १७ हजार ९३० किलो धानको धानको बीउ कृषकलाई वितरण गरेको जिल्ला कृषि विकास कार्यालयका प्रमुख पूर्ण ढुङ्गानाले बताउनुभयो ।

काभ्रे र भक्तपुरका किसानबाटै खरिद गरेको चाइनुङ्ग २४२, खुमल ४, खुमल १०, खुमल ११ जातको धानको बीउ जिल्लाको विभिन्न नगरपालिकाको दैवीप्रकोप व्यवस्थापन समिति र छ वटा कृषि सेवा केन्द्रबाट वितरण गरिएको हो ।

राष्ट्रिय बीउबिजन कम्पनीबाट १५ हजार किलो र सेभ द चिल्ड्रेनबाट दुई हजार ७०० किलो धानको बीउका लागि आएको अनुदानबाट धान खरिद गरेर वितरण गरिएको हो ।

धानको बीउको माग अत्यधिक भए पनि किसानको मागलाई पूरा गर्न नसकिएको उहाँको भनाइ छ । कार्यालय प्रमुख ढुङ्गानाले भन्नभयो– “भक्तपुरमा धानको बीउको मागलाई पूरा गर्न सकिएन, कतिपय सेवा केन्द्रमा कृषक धेरै आएर वितरणमा नै समस्या परेपछि कृषकले नै धान लुटेको समेत पाइयो ।”

अन्य जिल्लाको दाजोमा भक्तपुरमा रोपाइँ चाँडो हुने भए पनि धानको बीउ अभावले कृषकलाई समस्या परेको छ । रासस