काठमाडौँ, १८ जेठ । नेकपा (एमाले) का महासचिव ईश्वर पोखरेलले विपद् व्यवस्थापन प्रभावकारी गराउन र संविधान निर्माणको कार्यभार पूरा गराउन राष्ट्रिय सहमतिको सरकार गठनमा जोड दिइएको बताउनुभएको छ ।

दोलखा जिल्लाका भूकम्पपीडितलाई दिइएको राहत र पुनःस्थापनाको अवस्था बुझ्न तथा पार्टीले सञ्चालन गरेको राष्ट्रिय स्वयंसेवक अभियानको अनुगमनमा रहनुभएका महासचिव पोखरेलले रासससँग टेलिफोनमा कुरा गर्दै सहमतिको सरकारको नेतृत्व कसैको आत्मकेन्द्रित विषय नभई जसको नेतृत्वमा सहमति हुन्छ, त्यसमै अघि बढिने जनाउनुभयो ।

महासचिव पोखरेलले संविधान निर्माणको नयाँ कार्यतालिका र विपत् व्यवस्थापनको प्रभावकारी कार्ययोजनासहित सहमतिको सरकार गठन हुनुपर्ने बताउनुभयो । उहाँले आजै प्रेस चौतारी नेपाल, दोलखाले आयोजना गरेको अन्तक्र्रिया कार्यक्रममा आफूले वर्तमान प्रधानमन्त्रीकै नेतृत्वमा राष्ट्रिय सहमतिको सरकार गठन हुन्छ भन्ने प्रकारको कुनै अभिव्यक्ति नदिएको तर केही सञ्चारमाध्यमले त्यस्तो आशयका समाचार सम्प्रेषण गरेकामा खण्डन गर्नुभयो ।

महासचिव पोखरेलले आज दोलखाका राहत पुनःस्थापनाका सम्बन्धमा भएका कामबारे प्रजिअ प्रेमलाल लामिछाने र सरोकार भएकाहरुसँग छलफल गर्नुभएको थियो । उहाँ आजै पार्टीका स्वयंसेवकले बनाउँदै गरेको लापिलाङ उमाविको भवनको अनुगमन गर्नाका साथै पहिरो प्रभावित सिङ्गटी बजार पुग्नुभएको थियो । उहाँ सोमबार जिरी क्षेत्रमा जाने कार्यक्रम छ ।

पोखरेलका साथ सभासद् पशुपति चौलागाईँ, आनन्दप्रसाद पोखरेल र पार्वत गुरुङ, केन्द्रीय लेखा आयोग सदस्य शिवप्रसाद भण्डारी तथा पार्टीका जिल्ला अध्यक्ष ईश्वरचन्द्र पोखरेल, चौतारीका केन्द्रीय सल्लाहकार गणेश बस्नेतलगायत हुनुहुन्छ । रासस

• राष्ट्रिय सरकारको विपक्षमा उभियो ३० दल

जेठ १८, नुवाकोट । जस्तापाता प्रकरणमा दुई जना स्थानीय कुटपिट भएको विरोधमा सोमवार देखि नुवाकोटको त्रिशूली–छहरे–काठमाडौ सडक वन्द भएको छ ।

जस्ता पाताका सम्वन्धमा आइतवार भएको पत्रकार सम्मेलनमा आयोजक पक्षवाट दुई जना कुटिएको विरोधमा स्थानीयवासीे दोषीमाथि कारवाहीको माग गर्दै त्रिशूली–छहरे–काठमाडौ सडक वन्द गराएको स्थानीयवासी मधु कोइरालाले जानकारी दिए । 

सडक वन्द भएपछि नुवाकोटको पुर्वी क्षेत्रमा रहेका ३० भन्दा वढि गाविसका स्थानीय प्रभावित भएका छन् । शुक्रवार स्थानीयले नियन्त्रणमा लिएको एक ट्रिपर जस्तापाताको विषयमा निकै विवाद आएपछि सम्वन्धित निकायले तत्काल छानविन गरिनु पर्ने, स्थानीय कृष्ण वोहरा र शिव वोहरामाथि हातपात गर्नेलाई कारवाही गरिनुपर्ने, ट्रिपर चालकलाई अनुसन्धान गर्नु पर्ने माग गर्दे सडक मार्ग वन्द गरिएको स्थानयिले वताएका छन् । 

विहानैदेखि कविलास, थानसिह, भद्रुटारलगायत सात गाविसका स्थानीयले सडकमा टायर वालेर सडक अवरुद्ध गराएका छन् । सडकमार्ग वन्द भएपछि यातायात खुलाउन र जस्तापाताको विषयमा छानविन गर्न जिल्ला दैवी प्रकोप उद्धार समितिले अग्रसरता देखाएको छ । जिल्ला दैवी प्रकोप उद्धार समितिले बा ३ ख ३८४४ नम्वरको ट्रिपरलाई चालकसहित जस्तापाता छानविन नभएसम्मका लागी सेनाको मैथलिस्थित तालिम केन्द्रमा राखेको छ । 

लहान, १८ जेठ । घरायसी विवाद बढेपछि मिर्चैया नगरपालिका– २ मलहनिया खोरीका प्रमोद साहले सुतिरहेकी श्रीमतीको हत्या गरेका छन् । 

तीस वर्षीया श्रीमती अमिरदेवी साहको घाँटी थिचेर हत्या गरेपछि आत्महत्याको प्रयासमा पूर्व–पश्चिम राजमार्गमा दौडिएका उनलाई नम्बर नखुलेको सवारी साधनले ठक्कर दिँदा गम्भीर घाइते भएका थिए । 

इलाका प्रहरी कार्यालय मिर्चैयाका अनुसार घाइते भएका उनलाई उपचारका लागि विराटनगर लैजाँदा बाटोमा मृत्यु भएको छ । मृतक दम्पतीको शव परीक्षणका लागि लहानस्थित रामकुमार शारदा उमाप्रसाद मुरारका स्मारक अस्पताल पु¥याइएको छ । 

यसैबीच सप्तरीको पोर्ताहा गाविस– ५ का ३५ वर्षीय अनिलकुमार खिडहरि यादवले आज कन्चटमा गोली प्रहार गरेर आत्महत्या गरेका छन् । 

घटनास्थालबाट प्रहरीले एउटा कटुवा पेस्तोल बरामद गरेको छ । घटनाका सम्बन्धमा प्रहरीले आवश्यक अनुसन्धान गरिरहेको जनाएको छ । रासस 

काठमाडौँ, १८ जेठ । प्रमुख तीन दल र मधेसी मोर्चाले वर्तमान राजनीतिक सङ्कटको अन्त्य संविधान जारी गरेरै हुने ठहर गर्दै त्यसपछि राष्ट्रिय सहमतिको सरकार बनाएर पुनःनिर्माणमा एकताबद्ध भएर जुट्ने प्रतिबद्धता व्यक्त गरेका छन् । 

प्रमुख तीन दल र मधेसी मोर्चाका अध्यक्षसहित प्रधानमन्त्री निवासमा आज भएको बैठक राजनीतिक समस्या समाधान भएपछि मात्र राजनीतिक एकता हुने भएकाले सहमतिमा संविधान जारी गरेर पुनःनिर्माणमा जुट्नु बुद्धिमत्तापूर्ण हुने निष्कर्षमा पुगेको छ । 

संविधान र राष्ट्रिय सहमतिको सरकारका लागि मुलुकको अहिलेको राजनीतिक समस्या समाधानलाई पहिलो प्राथमिकतामा राखेर काम गर्नुपर्नेमा शीर्ष नेतृत्वबीच मतैक्यता कायम भएको छ । 

बैठकपछि संयुक्त लोकतान्त्रिक मधेसी मोर्चाका अध्यक्ष विजयकुमार गच्छदारले भूकम्पका कारण मुलुकले व्यहोर्नुपरेको महाविपत्तिको सामना गर्न सम्पूर्ण राजनीतिक दल र नागरिक पुनर्वास र नवनिर्माणमा एकताबद्ध भएर अघि बढ्नुको विकल्प नरहेको बताउनुभयो । 

उहाँले भन्नुभयो – “गफका लागि गफ गर्ने नभई काम गर्ने किसिमले नेतृत्वपङ्ति अग्रसर हुनेमा बैठकमा मतभेद रहेन, मुलुकसामु उत्पन्न चुनौती सामना गर्न र त्यस्ता चुनौतीबाट देशलाई पार लगाउँदै अघि बढ्न पहिले राजनीतिक समस्या समाधान हुनुपर्छ ।” 

वर्तमान राजनीतिक समस्या समाधान गर्नु भनेको सहमतिमा संविधान बनाएर घोषणा गर्नु हो भन्दै अध्यक्ष गच्छदारले राजनीतिक समस्या समाधान भएपछि मात्र राजनीतिक एकता कायम हुने बताउनुभयो । 

भूकम्पबाट सिर्जित जटिल परिस्थितिको सामना गर्न सबै पक्ष एकजुट हुनु आवश्यक रहेको बताउँदै उहाँले राष्ट्रिय सहमतिको सरकार गठन गरेर कम्तीमा पनि तीन÷चार वर्ष नयाँ नेपाल निर्माणको अभियानमा एकजुट भएर काम गर्ने प्रतिबद्धता बैठकमा जनाइएको जानकारी दिनुभयो । 

सञ्चारकर्मीको एक प्रश्नको जवाफमा अध्यक्ष गच्छदारले भन्नुभयो – “एक महिनाभित्रै संविधान जारी गर्ने, त्यसपछि राष्ट्रिय सहमतिको सरकार गठन गरेर पुनःनिर्माण र नवनिर्माणका माध्यमबाट जनतामा विद्यमान नैराश्यता र दुःखकष्ट हटाउने प्रयत्न गर्नेछौँ ।” 

बैठकमा नेपाली काँग्रेसका सभापति एवम् प्रधानमन्त्री सुशील कोइराला, नेकपा (एमाले)का अध्यक्ष केपी ओली, एनेकपा (माओवादी)का अध्यक्ष पुष्पकमल दाहाल सहभागी हुनुहुन्थ्यो । रासस