काठमाडौं, कार्तिक ५ । ‘वाटरगेट’ कान्डका समयमा अमेरिकाबाट प्रकाशित हुने वासिंगटन पोष्टमा सम्पादक रहेका पत्रकार बेन ब्राडलीको निधन भएको छ । 

९३ वर्षीय ब्राडलीकै सम्पादकत्वमा निस्कने उक्त पत्रिकामा राष्ट्रपति रिचार्ड निक्सनसमेत संलग्न रहेको ‘वाटरगेट’ कान्ड प्रकाशित भएपछि सन् १९७४ मा निक्सनले राष्ट्रपति पद गुमाउनु परेको थियो ।

अमेरिकी इतिहासमा आजका दिनसम्म निक्सन नै त्यस्ता राष्ट्रपति हुन्, जसले यस्तो कान्डमा फसेर राजीनामा गर्नुपरेको छ । रिपब्लिकन पार्टीका तर्फबाट अमेरिकाको ३७औं शक्तिशाली राष्ट्रपति बनेका उनले ‘वाटरगेट’ कान्डमा संलग्नता पुष्टिसँगै संसदबाट महाभियोग लाग्ने करिब निश्चित देखेपछि राजीनामा गरेका थिए ।

ब्राडलीको निधन उनकै घरमा प्राकृतिक कारणले भएको पत्रिकाले जनाएको छ । ब्राडलीले आफू सम्पादक रहेको अवधि सन् १९६८ देखि ९१ मा वासिंगटन पोष्टलाई अमेरिकाको एक सम्मानित पत्रिकाका रुपमा स्थापित गरेका थिए ।

सन् २०१३ मा उनलाई अमेरिकाकै सम्मानित नागरिक सम्मान ‘प्रेसिडेन्सीयल मेडल अफ फ्रिडम’ प्रदान गरिएको थियो । ब्राडली उनको समयका सबैभन्दा चर्चित र राम्रा सम्पादक रहेको र त्यही समयमा पोष्टले ठूलो फड्को मारेको टिप्पणी राष्ट्रपति बराक ओबामादेखि विभिन्न व्यक्तिहरुले गरेका छन् । (एजेन्सी)