काठमाडौं, कार्तिक ५ । विश्व स्वास्थ्य संगठन (डब्लुएचओ)ले इबोला भाइरसका सम्बन्धमा आपतकालीन बैठक बोलाएको छ । जेनेभामा हुने बैठकमा विभिन्न मुलकको सीमा नाकामा चेकजाँच र त्यहाँ अपनाउनु पर्ने सावधानीलगायतका विषयमा छलफल हुने बीबीसीले जनाएको छ ।

इबोलाको महामारी तीव्र रुपमा फैलिएपछि डल्बुएचओको व्यापक आलोचना भैरहेको छ ।

यसैबीच, अमेरिकाले इबोला प्रभावित तीन अफ्रिकी मुलुकबाट आफ्नो मुलुक आउने यात्रुहरुका लागि नयाँ नियम लागू गरेको छ । यात्रुहरुमाथि शिकागो, न्यूयोर्क, वासिंगटन, डलास र एटलान्टा विमानस्थलमा विस्तृत जाँच गरिने भएको छ ।

पश्चिम अफ्रिकामा महामारीको रुपमा फैलिएको इबोला संक्रमणका कारण ४५ सयको मृत्यु भैसकेको छ । गिनीबाट सुरु भएको इबोलाको संक्रमणबाट सियरालियोन, लाइबेरिया बढी प्रभावित भएका छन् भने रोग प्रभावित नाइजेरिया भने इबोलामुक्त घोषित भएको छ ।